ᓂᕈᐊᖅᑐᓕᕆᔨᒻᒪᕆᒃ ᑐᓴᖅᑎᑦᓯᕗᖅ ᑐᙵᕕᒃᑯᑦ ᓂᕈᐊᖅᑎᑦᓯᓂᐊᕐᓂᖏᓐᓂᒃ ᐊᖓᔪᖅᑳᑉ−ᑐᒡᓕᒃᓴᖓᓂᒃ
(ᐆᑦᑑᑉᐱᕆ 3,2022 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐅᓪᓗᒥ ᑐᓴᖅᑎᓯᖅᑲᐅᔪᑦ ᓈᓐᓯ ᖃᕆᑕᖅ−ᓕᓐᑎᐅ, ᐱᓕᕆᖃᑎᖃᕐᓗᓂ ᑲᒻᐸᓂᓂᒃ ᐊᔮᔮ ᐱᔪᒐᖅᓴᐅᑎᓄᑦ ᑐᓴᐅᒪᔾᔪᑎᓕᕆᓂᕐᒧᓪᓗ, ᓂᕈᐊᖅᑐᓕᕆᔨᒻᒪᕆᐅᓂᐊᕐᓂᖓᓂᒃ (CRO) ᑐᙵᕕᒃᑯᑦ ᓂᕈᐊᖅᑎᑦᓯᓂᕆᓂᐊᖅᑕᖏᓐᓄᑦ ᐊᖓᔪᖅᑳᑉ−ᑐᒡᓕᒃᓴᖓᓂᒃ ᑏᓰᒻᐱᕆ 12, 2022.
ᓂᕈᐊᕋᑦᓴᓕᐅᕐᓇᐅᓂᐊᖅᑐᖅ ᑕᕝᕗᖓ ᓂᕈᐊᕐᓂᕐᒧᑦ ᐆᑦᑑᑉᐱᕆ 31-ᒥᓂᒃ ᓅᕙᐃᒻᕙ 4-ᒧᓄᑦ, 2022. ᓂᕈᐊᕋᑦᓴᐅᒍᓐᓇᖅᑐᑦ ᐊᒻᒪᓗ ᓂᕈᐊᖅᑏᑦ ᑲᓇᑕᒥᐅᑕᐅᔭᕆᐊᓖᑦ, ᐅᑭᐅᖅᑖᖅᓯᒪᓗᑎᒃ 16-ᓂᒃ, ᐊᒻᒪᓗ ᐃᓄᐃᑦ ᐊᑎᖃᖃᑕᐅᔪᑦ ᓄᓇᕗᑦ ᐊᖏᕈᑎᖏᓐᓂ. ᓂᕈᐊᕋᑦᓴᓕᐅᕈᑏᑦ ᑎᑎᕋᕐᕕᒃᓴᑦ ᐱᔭᐅᔪᓐᓇᖅᑐᑦ CRO−ᒥᒃ, ᓄᓇᓕᓐᓂ ᑐᖅᑲᑕᕐᕕᖕᓂᒃ, ᐅᕝᕙᓘᓐᓃᑦ ᑐᙵᕕᒃᑯᑦ ᐃᑭᐊᖅᑭᕕᖓᓂᒃ ᓂᕈᐊᕋᑦᓴᓕᐅᕐᓇᖅ ᒪᑐᐃᖓᓕᖅᐸᑦ.
ᓂᕈᐊᕋᑦᓴᓄᑦ ᐱᓕᕆᐊᒃᓴᐅᕗᖅ ᓇᓗᓇᐃᕆᓂᖅ ᓂᕈᐊᕋᑦᓴᙳᖅᑎᑦᑎᔾᔪᑏᑦ ᐸᐃᑉᐹᑦ (ᐃᓚᒋᔭᐅᓗᑎᒃ ᐸᓖᓯᒃᑯᓐᓂᒃ ᒪᓕᒐᕐᓂᒃ ᓯᖁᒥᑦᓯᓚᐅᖅᓯᒪᒻᒪᖔᖅ ᖃᐅᔨᓴᖅᑕᐅᒍᑏᑦ) ᐱᔭᐅᓯᒪᒐᓗᐊᕐᒪᖔᑕ CRO−ᒧᑦ ᒪᑐᙱᓐᓂᖓᓂ. ᓂᕈᐊᕋᑦᓴᓕᐅᕈᑏᑦ ᐸᐃᑉᐹᑦ ᐱᔭᐅᓯᒪᙱᑉᐸᑕ ᒪᑐᕕᒃᓴᖓᓂ, ᓂᕈᐊᕋᑦᓴᙳᕋᓱᐊᖅᑐᖅ ᐊᔪᖅᑎᑕᐅᓂᐊᖅᑐᖅ ᓂᕈᐊᕋᑦᓴᐅᓂᕐᒥᒃ ᑏᓰᒻᐱᕆ 2022 ᓂᕈᐊᕐᓇᒥ. ᓂᕈᐊᕋᑦᓴᓕᐊᖑᔪᑦ ᓴᒃᑯᐃᒍᓐᓇᖅᑐᑦ ᓂᕈᐊᕋᑦᓴᙳᖅᑎᑕᐅᒍᑎᒥᓂᒃ ᓅᕙᐃᒻᕙ 7, 2022-ᒧᓄᑦ ᖃᐅᔨᓴᐅᑦ ᑕᓪᓕᒪᓄᐊᖅᐸᑦ ᐅᓐᓄᓴᒃᑯᑦ (5pm) ᓄᓇᓖᑦ ᖃᐅᔨᓴᐅᑖᒍᑦ.
ᓂᕈᐊᖅᑏᑦ ᑐᙵᕕᒃᑯᑦ ᓂᕈᐊᖅᑎᑦᓯᓂᖏᓐᓄᑦ ᐊᖓᔪᖅᑳᑉ−ᑐᒡᓕᑦᓴᖓᓂᒃ ᓂᕈᐊᕈᓐᓇᓂᐊᖅᑐᑦ ᐊᑐᕐᓗᑎᒃ ᑕᓪᓕᒪᓂᒃ ᐊᔾᔨᒌᙱᑦᑐᓂᒃ ᓂᕈᐊᕈᓯᕐᓂᒃ, ᓂᕈᐊᕐᓂᐅᒍᓐᓇᖅᑐᑦ ᑐᖔᓂ ᓂᕈᐊᕐᓇᐅᑉ ᓂᕈᐊᕐᓂᖅ ᑏᓰᒻᐱᕆ 5, 2022, ᓂᕈᐊᖅᑐᓕᕆᔨᓄᑦ ᐅᐸᑦᑕᐅᖃᑦᑕᕐᓂᖅ, ᓂᕈᐊᕈᔾᔭᐅᓂᖅ, ᑎᑎᖅᑲᓂᐊᕐᕕᒃᑯᑦ ᓂᕈᐊᕐᓂᖅ ᐅᕝᕙᓘᓐᓃᑦ ᓇᖕᒥᓂᖅ ᓂᕈᐊᕆᐊᖅᑐᕐᓂᖅ ᓂᕈᐊᕐᓇᐅᑉ ᐅᓪᓗᖓᓂ ᑏᓰᒻᐱᕆ 12, 2022.
ᑐᑭᓯᒋᐊᒃᑲᓂᕐᕕᒃᓴᖅ:
ᓈᑎᐊ ᓯᑰᓐ
ᐊᔮᔮ ᑐᓴᐅᒪᔪᑎᓕᕆᔨᒃᑯᑦ
ᐅᖄᓚᐅᑖ: 867-979-1484
ᐃᕐᖐᓐᓈᕈᑖ: nadiac@ayaya.ca
2022 NTI Elections Rules and Procedures-Inuk
