Hunnanik Tohagakhat

Hunnauvat ukkua NTI-kut?
Nunavut Tunngavik Timingat (NTI-kut) kivgaktoiyut Inuinaknik Nunavunmi tatvalu havagiyait tahapkua Nunavunmi Angikutaat atoktaokuvlugit maligait. NTI-kut munagiyait tahapkua Inuit nanminigiyait nunnautait, manighagiyait, havagiyait, tatvalu ikkayokpaktot Inuit piyunaotaitnik piyomayaitniklo.

Hunnaungmat tahamna NTI-kut Angayokaghamik niguaknik?
Tahamna NTI-kut Niguaktitiffaknikut Angayokaghamik ihomaghutauniakmat kinamik NTI-kut Angayokaginiaktat, hivuliktighak timioyumik tikkitilugo tahamna nutamik Angayokaghamik niguagiakakniakmingmata tatvani December 2028-mi, tatvalu hivulikluni nippigiyaoniaktok Inuinaknik.

Kakugo niguaktitiniakat ?
Tahamna NTI-kut niguaktitiffaakniaktut Angayokaghamik tatvani May 27, 2026-mi.

Kina niguagungnaktok ?
Niguakataoyungnaktutit Inuinauguvit, attiliokataohimaguvit tatvani Nunavut Angikutaatni, 16-nik ukkiukaguvit angayughiotkiyaoguvitlunin tatvani niguakviuniaktup ubluani, tatvalu attilioghimaguvit tatvani niguagungnaktut titikami.

Kitkut uktugungnaktut NTI-kut Angayokaghatnik?
Tahapkua Niguagaghangutitaoniaktot Nunavunmiutaolutik Inuinauyagiakaktot tatvalu nallaumayagiakaktait tahapkua NTI-kut maligait titigaghimayot tatvani NTI-kut Maligaitnik.

Kanok hivitiginiaka uma Angayokap kigligha ighivautauluni ?
Una niguaktauyok Angayokap ighivautanut innighiklugo tahamna NTI-kut nutamik Angayokaghamik niguaktitiniaktot tatvani December 2028-mi.

Niguakutinik Tohaktitjutighat

Nammut niguagiaktogiakaktunga?
Niguagiaktogungnaktutit tatvunga nunaliitni niguagiaktokviatnut, niguagiaktoknagikniaktitlugit, angilgakviatnun niguagomayut uppaotiyungnangitpata niguakvikmunm titigakakvikut niguagungnaktut uvalunin kinamik kivgagigilugo niguaktitiyungnaktot.

Uvanga niguagungnaktunga Kablunaat nunaatni nunakaguma?
Hii. Inuinauguvit, attiliokataohimayuvit Nunavut Angikutaatni, 16-nik ukkiukaguvit angayughiotkiyaoguvitlunin, attiit titigaghimakpat tatvani niguagungnaktut titigaatni, niguagiaktugungnaktutit nalliakni Kablunaat nunaatni niguagiaktokviatni uvalunin titigakakvikut niguagugnaktutit uvalunin kinamik kivgagigilugo niguaktitiyungnaktotit.

Nanni niguagungnaktunga Kablunaat nunaatni Kanatami?
Tahapkua niguagiaktokviit angmaumaniaktot nunani Edmonton, Winnipeg, Yellowknife, Ottawa-milo.

Hunnamik naghagiakaktunga niguagiaktuguma?
Naghatjavatit tahapkua NTI-kut attiliokhimayok naunaipkutit uvalunin kavamatkunit ilviit naunaipkutit piksakaktok. Tahamna attiit titigakhimayok tatvani ilviit naunaipkutingni ajikutauyagiakaktok taffuminga NTI-kuni attilioghimayok attokataktavit.

Kanok Attiliogungnaktunga niguakataoyamni?
Ilviit attilioghimayagiakaktutit tatvani Nunavunmi Angitkutaatni. Attiliogiakaguvit, tohaktitjavat una Nunaliitni Tohaktitilikiyii, tohaktitjavat una NTI-kuni Attilioknikut Havakviat, uvalunin NTI-kut kagiyaoyaatni titigakviat.

Hunnaungmat una Niguaknagiktittinik ?
Tamna Niguaknagiktittinik kinatuinak niguaknagigungnaktok tikkitinago tahamna Niguagiaktokviop Ublua tahapkua niguagiaktokvighat naunaikniakut.

Hunnaugmat una titigakakvikut niguagutat?
Una titigakakvikut niguagutat tughiotigiyungnaktat tatvanga Ataniatni Niguaktulikiyiit niguagumaguvit titigakakvikut niguagungnangitkuvit uppautilutik tatvunga niguakvikmut.

Hunnaugmat una kinamik inukmik kivgaktoktikakluni niguaknik?
Una kinamik kivgaktoktikakluni niguaknik pitjutaoyok una niguakataoyungnaktok kingamik kivgaktoktikakluni niguagungnaktok tamna kivgaktoktia uppautiluni niguakvikmun titikami naunaipkutimi pihimayakakluni.

Uvanga niguagungnaktunga ataohinaongitumik niguakutimik?
Imannak. Niguagiakaktutit ataohiiklutit.

Uvanga ihomaghuklunga niguagiakangitunga?
Hii. Niguagiakangitutit niguagumangitkuvit, attiliokataogaloaklutik. Kihiani, NTI-kut niguakutiaktagaloagiyaatit, ilviit nipiit pimagiuyok.

Ikkayoktaonik tatvalu Ihuakutikaknik

Ikkayoktaoyagiakagoma niguakataoyomavlunga?
Tohaktitjavat una Ataniat Niguaktulikiyiit uvalunin una Toglia Niguaktulikiyiit tatvani nunagiyakni (tamnaukataktok Nunaliitni Tohaktitilikiyii) tatva una ilingnun uppautiyungnaktot niguaktitiyaktoklutik ilingnik ihomaghuklutit kihiani taima hatkiomakpata niguakutighat nunaliitni.

Tamna niguagiaktokvik aghalualikmik ighivaotamik ingilgatjutikaka tungmigait?
Tamaita tahapkua niguagiaktokviit pitakangitot aghalualikmik ighivautamik ingilgatjutaitnik. Tohaktitjavat una nunaliitni Tohaktitilikiyii ikkayoktaoyomaguvit.

Tahapkua niguakutit titikat numiktitaohimavat Inuktitut tatvalu Inuinnaqtun?
Tahapkua niguakutit titikat hatkiomayut titigaghimayot Kablunaatut, Inuktitut, Inuinnaqtun-lo.

Niguagiaktoknikut Aolatjutait

Kanoginiaka ihuinaaknigoma niguakutigiyamnik?
Toghiktogungnaktutit nutamik niguakutighamik tatvanga niguaktulikiyioyomit.

Kanok tahapkua niguakutaoyut titikat kititaovakpat?
Tahapkua niguakutaoyut kittitaovaktot tamaitni nunaliitni tahamna niguaknik umiktaogangat, malikavlutik tahapkuninga NTI-kut niguaktulikinikut maligaitnik.

Una niguagaghanguktitaoyok tikuaghiyungnaka takkugiyioyughamik niguaktititilugit?
Hii, hapkua niguagaghanguktitaoyot tikuaghiyungnaktot ataohikmik takkugiyiotughamik tamaitni nunaliitni takkugiyughanik niguakutinik kittitititlugit.

Kiiaa ataniktuta tahamna niguaktitinik?
NTI-kut titkuakhimayat una Atanioloaktok Niguaktulikiyiitnik (CRO) munagitkuvlugit tahapkua niguakutaoniaktot. NTI-kut huli tikuaghihimayot ahianik allamik Niguaktulikinikut Kamisinamik ihomataoniaktok tahapkuninga aivatjutikaknikata niguakutinik.

Huliniakat niguaktaghimalikata?
kina akimayok niguaktaovluni kilamik tohaktitiniaktot niguakutinik kitititaghimalikata tatvalu una nutaak Angayokaak iliitagiyaohimalikat.

Niguagaghanguktitaoyut Niguakutighamingnik Ukkautait

Kanok iliituginiaktigigo tahapkua niguagaghanguktitaoyot?
Uppautikataklutik niguaktaoyomayot unipkaktitlugit, nallautikuktot nallaklugit, kagitaoyakut titigaghimayait niguakutinik, tatvalu titigaghimayot taiguaklugit unipkaktunik.

Tahapkua niguagaghanguktitaoyot nanituinak niguagutighamingnik ukagiaktugungnakat?
Tahapkua niguagaghanguktitaoyot maligiakaktait ukkua NTI-kut niguakutinik maligait hivunighitjutaitlo, tahapkua takkunaktut tatvani ukkua NTI-kut kagitaoyakukutaitni.

Tahapkua manniit niguakutighanik akkiliktotait ukkua niguaktaoyomayot kiklikakat?
Una niguagaghanguktitaoyok manniit akkiliktotiminik niguakutighanut avatkulaitok $40,000 tallanik.

Tahapkua niguagaghanguktitaoyot katitaolutik aivakatigiikniakat tautuktaolutik?
NTI-kut parnaiyaiyut kungiaktitiyomavlutik tamaitnik tahapkua niguagaghanguktitaoyot aivakatigiikniaktitlugit tatvani Aqsarniit Hinniktakviatni Iqalungni May 15, 2026-mi (uttakiyot huli naunaitiaghimangitmata).

Ahianik Appikutighat

Kanok nutangugungnakitigo tahapkua naunaipkutit niguakutighatka?
Tohaktitlugo una NTI0kut Attiliokutinik Havakviat una attiliokutinik kikligha kangiktinago (kiklikaktut umikviatni tahaffuma niguagaghanguktitaoyot umikviat, tatvauvuk April 21, 2026-mi niguaktitiffakniaktot umikviat).

Uvanga niguaktitauyungnaktunga tahamna kikligha kangigaluaktitlugo nutangugiakaktitlugit tahapkua naunaipkutitka?
Hii. Niguagungnaktutit huli. Naghatjavatit tahapkua ilviit kinaungmangata naunaipkutitit uvalunin ahianik titikat naunaipkutit kingaungmangata uvalunin titikat allanguktaokpata (uktutigilugo, attiit alanguknikat).

Hapkua inolgamiit uktokuyaovat niguagiaktokataolutik?
Hii. Inolgamiit 16-nik ukkiuktaktot angayughiokpatalunin nigoaktitaoyungnaktot tatvalu uktokuyaonginaktot niguakataotkuvlutik.

Hunnaungmat tahamna niguagiaktoghimayot kaffiotilangit?
Niguagiaktoktut kaffiotilangit naunaipkutait kaffiongmangata tahapkua niguagungnaktot niguagiaktokataohimayot niguaknaktitlugo.

Tahapkua pivalialikiyiit unipkaghamingnik piyungnakat niguagiaktokviitni?
Tahapkua pivalialikiyioyut kaitkuyaokatangitot niguagiaktokvikmun takkughaukunagit tahapkua niguagiaktoghimayot.

Tammainiguma tahapkuninga uvanga kinnaungmangata naunaipkutimnik?
Tohaktitlugo una Atanioyok Niguaktolikiyiitnik (CRO) kanok namagiyaitnik ihuagkutighanik naunaipkutinik. Niguaktitaoyungnaktugaluyutit kanok naunaipkutikaguvit ilviit kinaungmangata.